Saturday, 23 February 2019

亞歷山大與希臘化時代:西方科學和藝術史第一個黃金時代(14)

亞歷山大與希臘化時代
西方科學和藝術史第一個黃金時代

阿里斯塔克斯(Aristarchus of Samos)用作推算地日、地月距離以及日月半徑既幾何建構,10世紀抄本

希臘化天文

上一期簡介完希臘化時代既數學成就,今期我地就黎講下一個同樣響希臘化時代取得極重大進展既學術領域:天文學(astronomy)同宇宙模型。天文學同數學一樣,響古巴比倫時期開始萌芽並獲得最早既重要成果。巴比倫人從有文字記載起就開始有系統地編製星表、發明星座、觀察及記錄夜空中出現既彗星,並發展出一套60進制既數字系統,進而奠定左1分等於60秒、1小時等於60分,以及一個圓360度既基礎。隨著公元前4世紀亞歷山大大帝征服美索不達米亞之後,大批巴比倫的泥板被翻譯並深遠地影響了希臘化時代的天文學發展。而跟數學一樣,希臘化天文學家利用巴比倫長達千年的觀測數據,逐步完善了希臘的天文理論及宇宙模型,最終發展出地心模型和日心模型兩套影響後世極其深遠的理論。希臘化時代天文成果極其豐碩,而希臘人亦會歷史上首次提出地球及星體的幾何形狀乃球體、計算出地球正確的半徑和周長、史上首次嘗試計算地月及地日之間的距離、發現潮汐係由月球引起、首次提出星星乃距離極遙遠的其他太陽、發現地球各地存在時差、以及發現天文學上既歲差現象(即地球自轉軸會緩慢地順一個圓形晃動)。今集會對上述天文學及宇宙模型響希臘化時代獲得既進步同發展一一作出講解。

阿基米德(Archimedes),思想前衛既天文學家日心模型中一位倡議者

響希臘人之前,美索不達米亞的古人相信大地係一個圓形既平面,而響古中國,長久以來獲普遍接受既世界模型係天圓地方。有記錄最早發現地球乃一個球體既,係古希臘人。雖然希臘人如何發現地球係球體呢點已經不可考,但普遍後人估計佢地係因為觀察到遠處入港的船隻先看到桅杆然後才見到船身,以及月蝕時地球投影到月球上的圓形影子先至推斷出地球係圓形。響公元前3世紀末,希臘化天文學家埃拉托斯特尼(Eratosthenes,公元前276至194年,曾任亞歷山大圖書館館長,跟阿基米德為好友)進一步利用夏至中午時太陽光響亞歷山大港及塞耶尼城投下倒影既角度差,計算出地球正確的周長為252,000斯塔德(Stadium,古希臘長度單位),約為40,074公里,比現代計算僅誤差0.16%。


阿波羅尼奧斯喜帕恰斯托勒密所提倡既宇宙deferent本輪epicycle均輪心模型

宇宙方面,古希臘時代既天文學家歐多克索斯(Eudoxus of Cnidus,公元前約390年至337年)提出地心模型(geocentric model),認為地球乃一個位於宇宙中央既球體,遠處不動既星星係位於一個不動既大球體之上,而行星則係位於地球同星星之間既轉動球體之上,呢個宇宙模型獲得亞里士多德既接納和推崇。到左希臘化時代,呢個理論遭到質疑,因為同心圓模型解釋唔到行星運行時速度既改變甚至逆行現象。於是希臘化時代既天文學家提出左兩個理論黎解釋:一,響地心模型中加入本輪(deferent)和均輪(epicycle),呢個模型由上期提到既希臘數學家阿波羅尼奧斯(Apollonius)同公元前2世紀天文學家喜帕恰斯(Hipparchus)發展出黎;二,拋棄地心模型引入日心模型(heliocentric model),認為太陽係自發光既恆星,將太陽置於宇宙的中心,地球和其他行星圍繞太陽轉動,而星星則係距離遙遠既其他恆星,呢個理論則由前4至3世紀既天文學家阿里斯塔克斯(Aristarchus of Samos)提出,並被阿基米德(Archimedes)及另一位居住在塞琉古帝國首都既天文學家塞琉西亞的塞琉古(Seleucus of Seleucia)支持。因此可見,日心說及地心說兩個理論最早均由希臘人提出,並且當時太陽為宇宙中央既可能性已經由埃及傳到塞琉古王國,應該唔少人都已經知道。事實上,早響哥白尼既1,800年前,響亞歷山大港博物院既演講廳中,就曾經迴響住日心說及地心說之間既辯論。阿基米德《數沙者》(The Sand Reckoner)書中更曾經利用日心模型推算出宇宙的直徑乃10^14斯塔德並計算出填滿宇宙所需的沙粒數量為10^63粒,並曾經研究心理物理學及計算太陽視差。日心模型響托勒密王朝並未受到刻意既排斥及打壓,可見希臘化時代對新科學理論既寬容,然而,由於阿里斯塔克斯既日心理論其中一個重要既條件:視差現象(parallax)未能被觀察到,加上當時未使用橢圓軌道而用圓形軌道均速運動既日心模型響推算行星位置時未能比較地心模型有優勢,所以日心說響辯論中處於下風,未被大多數天文學家接受。然而,阿里斯塔克斯就曾經為自己提出既理論辯護,提出由於星星距離太陽太遠因此視差未能被觀察到;而佢既模型將響18個世紀之後復活並為哥白尼所提倡,克卜勒(Kepler)則引入橢圓軌道,發現克卜勒三大定律改良日心模型令該模型比起地心模型更能準確預測行星位置,終於取代地心模型成為標準既宇宙模型。17世紀科學革命既種籽,其實早響公元前既希臘化時代已經種下。

歲差現象(axial precession)天文學家

除了提出日心模型之外,阿里斯塔克斯仲曾經嘗試利用幾何原理計算地日同地月之間既距離,同樣係人類史上首次。佢計算出太陽視直徑為0.5度(現代為1,920角秒,稍多於0.5度),地球的半徑為月球的2.85倍(現代計算為3.5倍)、太陽半徑為地球既6.7倍(現代為109倍)、地月距離為地球半徑20倍(現代為60.32倍,喜帕恰斯利用相同既幾何建構估算出67倍,羅馬時代既托勒密進一步估算出59倍既數字,已經相當接近真實值)、地日距離為地球半徑380倍(現代為23,500倍)。雖然阿里斯塔克斯的計算同真實數字相差甚遠,但以那個年代計係劃時代既成果,而佢利用作推斷出呢個結論既幾何建構亦都被證實無誤,佢成功利用嚴密既邏輯證明太陽比地球大、月球比地球細既成果,並用來作為地球繞日運行、月球繞地運行既證據。阿里斯塔克斯亦都成功區分恆星年同回歸年。到左公元前2世紀,根據羅馬時代地理學家斯特拉波(Strabo),塞琉西亞的塞琉古進一步點出潮汐強度同時間長短響世界各地有所不同,從而推斷出潮汐源於月球引力既成果。差唔多同一時間,喜帕恰斯(約公元前190年至120年)計算出一年既長度為365.25減1/300日,準確至跟現代估算只有14分鐘既誤差,且算出一個朔望月週期為29.53058天,跟現代估算僅相差0.00001天,為曆法學作出重大貢獻,佢亦都建基於阿里斯塔克斯既成果,於公元前127年發現歲差現象(axial precession),即地球自轉軸既晃動,並計算出一個週期為36,000年。他繪製出包含1025顆恆星的星圖、創立星等劃分星星光度的概念,挑戰亞里斯多德星星不生不滅的理論,並第一次嘗試利用日心模型作幾何計算,以及地球上四季既長度並不相等,挑戰行星均速運行既傳統智慧,得出行星繞日運行軌道並不是完美既圓形既推論,因此可以話佢幾乎發現左行星以橢圓軌道繞行太陽呢個事實。可惜既係佢始終唔夠大膽提出呢個理論,因為當時希臘哲學對天體運行軌道為圓形既理念係根深蒂固,佢最終回到利用均輪本輪以及地球位置偏離圓形軌道的圓心來解釋夏至離太陽較遠,冬至離太陽較近既觀察。除此之外,佢亦都利用天體模型驗證巴比倫既日月蝕觀察,發現阿里斯塔克斯所計算出既地月距離過小,並以數學預測日月蝕等等。除托勒密埃及外,塞琉古的天文學雖然較少人知道,但仍作出過若干創新性貢獻,例如一塊年代可以追溯到希臘化時代(公元前350年至前50年)既巴比倫天文學泥板中,塞琉古治下既巴比倫天文學家就響歷史上首次利用木星既速度—時間曲線(velocity-time graph)以下既面積計算出木星響特定時間內既位移(displacement)。今日既物理學家仍然利用相同既原理計算物件響特定時間內既位移。

希臘化時代巴比倫天文學速度—時間曲線計算出木星響特定時間內既位移

公元前1世紀,希臘化時代既天文學因羅馬對地中海東部希臘化世界既征服傳入羅馬,公元2世紀,羅馬治下埃及亞歷山大港的希臘天文學家托勒密(Ptolemy)將當時已知既天文知識編集成書,雖然書中沿用地心模型而未有採用更革命性既日心模型,但響歐洲直到公元16世紀佢既宇宙模型(托勒密模型)仍然係學術界主流既標準模型。響伊斯蘭世界,阿里斯塔克斯既日心模型則更獲得更大既重視,但普遍黎講,一直到19世紀既1838年,德國天文學家弗里德里希·威廉·貝塞爾(Friedrich Wilhelm Bessel)先第一次成功觀察到視差,托勒密模型才被確鑿既證據同嚴謹既論證所推翻,阿里斯塔克斯的日心模型才最終被得到證實。而希臘化天文學同宇宙既成果,唔少都獲得證實,例如關於潮汐既起源、歲差現象等等。希臘化天文學短短200年間所取得既成就,以距今2,000多年之前既世界黎講,可以稱得上係前無古人,直到16、17世紀既科學革命都係後無來者。

Wednesday, 20 February 2019

亞歷山大與希臘化時代:西方科學和藝術史第一個黃金時代(13)

亞歷山大與希臘化時代
西方科學和藝術史第一個黃金時代

歐幾里德(Euclid)雕像,19世紀

希臘化時代的數學成就

數學,係科學之母,係用來定義宇宙同世界既語言,數學同人類文明既進步息息相關。希臘數學既發展係從公元前7世紀開始起步,雖然比起美索不達米亞,尤其係巴比倫數學遲左好多個世紀,但希臘人站在前人肩上,好快就會後來居上並且追過巴比倫人既成就。數學既英文Mathematics字根亦來自古希臘文μάθημα(máthēma),而到左希臘化時代,數學既發展更加可以用爆炸性既進步黎形容,並誕生出歐幾里德(Euclid)、阿基米德(Archimedes)以及阿波羅尼奧斯(Apollonius of Perga)等影響後世極其深遠的數學家。

歐幾里德《幾何原本》約100

希臘化時代的第一個偉大數學家係大名鼎鼎既歐幾里德(Euclid),亦即《幾何原本》(Elements)的作者,生卒年份不詳,但大約生於公元前4世紀並終於公元前3世紀,佢進行學術研究及創作的主要地點是埃及的亞歷山大城。根據歷史文獻記載,數學既發展係得到托勒密政府既官方支持,歐幾里德曾經向托勒密一世私人授課,當被問到學習幾何學的要訣之時,歐幾里德曾回答托勒密「世上沒有通往幾何學的皇室大道」,意思就是學習幾何學並沒有捷徑。歐幾里德的著作覆蓋幾何(geometry)及數論(number theory),過程中利用嚴謹既邏輯為證,為整個歐幾里德幾何奠下基礎。《幾何原本》全書共15卷,中論述幾何基礎,包括基本定義及公理(axioms)等,如何以點、線建構出直線構成的幾何圖形,亦有論述幾何代數、圓、多邊形、比例及相似,十二面體的建構等,在此後的2,000多年直到現今都成為中學課程數學,尤其係幾何入門既基礎。與此同時,《幾何原本》中詳細研究質數、最大公因數、最小公倍數、平方數、立方數、幾何級數、無理數等議題,為數論既發展奠下根基,其影響之廣泛深遠,恕難以在此一短篇介紹文章中通通涵括。但筆者會介紹一個歐幾里德既數論成果,就係公元前4世紀末利用反證法(proof by contradiction)證明質數的數量係無限。歐幾里德先假設有r個質數(即p1=2, p2=3, ...如此類推直至pr),以及P=p1*p2*...*pr + 1,而P除p1至pr任何一個質數都會餘1,顯示P係一個p1至pr以外既質數,咁就同最初既假設,即質數只有有限數量既r個相悖,從而證明質數既數量應該係無限。筆者初次接觸呢個證明,係響大學1年級既數學堂上面。事實上,《幾何原本》中使用既極限(limit)思想,最終將為後來阿基米德所使用既窮舉法,甚至多個世紀之後微積分(calculus)既數學基礎。《幾何原本》於成書後的1,900年,明朝末年公元1607年被西方傳教士利馬竇以及徐光啟翻譯成中文傳入中國,成為西學東漸既一件里程碑式事件。其實,利馬竇及徐光啟僅翻譯前6卷,後9卷則要等到19世紀中期先完成翻譯。

阿基米德羊皮書手抄本

歐幾里德仍然在世既時候,希臘化世界又出左一位極其重要既數學家阿基米德(Archimedes)。阿基米德係一位傑出既數學家、物理學家、天文學家以及工程師,係古典時代既一代鬼才。佢出生於約公元前287年既希臘化殖民地西西里島既敘拉古(Syracuse),父親係天文學家,家族同敘拉古王室可能有關係,後來往埃及的亞歷山大城學習並進行教研工作,晚年時回到敘拉古。除左發現浮力呢個舉世聞名既物理學成就之外,阿基米德的數學成果同樣卓越,佢既《方法論》(Methods)響此後既好長時間內都係修習數學的標準教科書之一。阿基米德利用窮舉法處理拋物線求積、各種立體的表面積及體積既求解,成功()求出拋物線下闊1個單位的面積為1/3個單位平方,即方程y=x^2從0到1既定積分(definite integral,ie. 1^3/3-0^3/3=1/3)。佢亦都響《數沙者》中發明左利用指數表達極大數目的方法,阿基米德所提出的最大數字為[(10^8)^(10^8)]^(10^8),這個數字比同時期其他文明所發明的任何大數還要大。事實上如果將這個數字寫出,所需的空間將超過已知宇宙的大小,阿基米德以這種記數法推算填滿整個宇宙所使用既沙粒數量。此外阿基米德亦利用圓內外兩個96邊多邊形既方法,求得圓周率(pi)下限和上限為3.1408及3.14285之間。阿基米德既著作好多已經佚失,但成書於公元10世紀拜占庭,阿基米德手抄本(Archimedes Palimpsest)響20世紀既發現為史學界打開左一扇窗,利用現代既多光譜既影像分析,曾經被擦掉覆寫既阿基米德手抄本羊皮書吐出佢隱藏10個世紀既秘密,令歷史學家瞭解到亞基米德響數學理論上既成就比之前想像既走得更前。書中內容顯示阿基米德使用無限切片法求出立體的體積,並同近2,000年後既微積分達到相同既結果。因此響微積分既發展中,或許阿基米德係最前衛、最早有呢個概念既人,成果遠遠超過左佢既時代。公元前212年,第二次布匿戰爭中敘拉古遭到羅馬軍隊攻城,雖然軍力懸殊但亞基米德發明的守城器械扭力弩砲及「阿基米德之爪」拖延左羅馬軍兩年,直到城破後亞基米德被羅馬人派兵搜捕,當時他被羅馬士兵打擾時正在研究的數學畫圖法中的圓圈,佢反斥責羅馬士兵「別打擾我的圓圈」,結果被火遮眼既羅馬士兵用劍殺死,終年75歲。佢死後羅馬負責圍城戰既馬克盧斯亦因佢既死感到惋惜萬分,認為世界損失左一位偉大既數學家。阿基米德最終葬左響敘拉古阿格里真托之門附近,墓碑上刻著一個圓柱體內一個相同半徑既球體,以及證明球面的表面積是圓柱體表面積既2/3,可能呢個係阿基米德生前最引以為傲既成就。

圓錐曲線

另一位希臘化時代偉大數學家係阿波羅尼奧斯(Apollonius,公元前262年至190年),佢出生於愛琴海東岸既愛奧尼亞,但畢生幾乎都響埃及亞歷山大城度過並完成佢堪稱萬世經典既《圓錐曲線論》(conic sections),《圓錐曲線論》全書共八卷,當中只有前七卷流傳落黎,圓錐曲線響後來既天文學、物理學同光學得到廣泛應用,筆者大學Year 1時亦都學過關於圓錐曲線既皮毛知識。阿波羅尼奧斯提出利用一個平面切割一個圓錐體,可以得到圓形、橢圓、拋物線以及雙曲線,佢提出左呢d圖形既名字,阿波羅尼奧斯係其中一個最早深入研究呢d幾何圖形特點既數學家。《圓錐曲線論》頭4卷主要總結前人已經知道既成果,後3卷包含大量原創性既成果,包括研究交點、定點的法線(normal,即跟平面成垂直既三維向量)並由此決定曲率中心,找出曲線既漸屈線(Evolute)等等。響希臘化時代,圓錐曲線已經響天文同光學既發展中被廣泛應用。雖然當時人們仍未有質疑行星運行軌跡應為橢圓形而不是圓形,但響果個年代,天文學家已經有利用圓錐曲線解釋行星既運行以及將焦點理論應用響拋物面鏡子之中。到左1,800多年後,《圓錐曲線論》亦都成為左克卜勒(Kepler)、牛頓(Issac Newton)、哈雷(Edmond Halley)研究彗星以及行星運行軌跡同周期既數學基礎。此外,公元前2世紀既喜帕恰斯(Hipparchus)第一次引進三角函數(trigonometric ratios),被稱之為三角函數之父。

響希臘化時代之後既羅馬時代,雖然亞歷山大圖書館因未能從新的統治者處得到托勒密政府般既財政支持同重視而逐漸式微,但亞歷山大城到左呢個年代仍然培養左無數優秀既數學家,例如最早發現負數平方根問題既希羅(Hero of Alexandria)、代數之父丟番圖(Diophantus)、球面三角學之父Menelaus of Alexandria等等。亞歷山大城既學術成就,希臘化時代既科學精神,一直延續到古典時代晚期才告一段落。

希臘化時代既數學發展同古希臘有些許差別,希臘化時代的數學研究受到托勒密王國國家鼎力支持,並對學術研究既領域表現出極大既包容。講到呢度,可能大家唔知道除左響相對保守既中世紀之外,連古希臘都唔一定會包容顛覆性既學術成就。例如公元前約500年的古希臘數學家希帕索斯(Hippasus)發現2的平方根為無理數(irrational number),即不可以兩個整數的比例寫出,結果引發第一次數學危機。希帕索斯既下場係被畢達哥拉斯學派既門人推落海淹死,顯示出古希臘時代新的學說及理論仍然會面對舊有學術界的排斥及打壓。但希臘化時代的眾多理論推陳出新,在埃及亞歷山大港呢個學術中心,統治者以及學術界對新既理論同研究方向顯示出古代世界罕見既寬容,亦都因此為西方數學其中一個黃金時代創造左條件。而響上述既討論中,我地亦都可以睇到希臘化時代數學成果如何深遠影響古代、近代甚至現代科學。希臘化時代既成果,佢既應用至今仍隨處可見。

Friday, 15 February 2019

亞歷山大與希臘化時代:西方科學和藝術史第一個黃金時代(12)

亞歷山大與希臘化時代
西方科學和藝術史第一個黃金時代

亞底米神殿現代重建的仿製品

希臘化時代的偉建築

上回講過希臘化時代既城市建設,提到希臘化城市最大可以容納50萬左右既人口,比希臘化前記錄保持者巴比倫既20萬人口翻左超過一倍,直到羅馬城響公元1世紀達到100萬人口之前,係全世界最大都市。除左人口多之外,希臘化世界亦都充滿令人嘆為觀止既超級工程,正如上次所述,古代七大奇跡當中有超過一半同希臘人有關,可見希臘人工程技術既成就。今次筆者會講下呢批希臘化時代建造既建築奇跡:亞歷山大港燈塔(Lighthouse of Alexandria)、羅德島巨像(Colossus of Rhodes)以及以弗所亞底米神殿(Temple of Artemis, Ephesus)。

印有亞歷山大港燈塔圖案既銅幣

關於亞歷山大港燈塔既建造過程以及特點上篇文章大約提過下,亞歷山大港燈塔係歷史界已知世界最早既燈塔,亦都係古典時代除金字塔外世界最高既建築物。根據文獻記載,燈塔由淺色巨大石塊建成,高138米即相當於46層樓高,頂部設有發射光線既火炬及巨型鏡子,並以希臘神話中海神之子崔萊頓(Triton)雕像作裝飾。佢開建於公元前284年左右(確切日期不詳),設計佢既建築師相信係克尼多斯的索斯特拉都斯(Sostratus of Cnidus)。根據羅馬學者斯特拉波(Strabo),該建築物由托勒密既朋友索斯特拉都斯出資建造。而根據另一位羅馬時代學者老普林尼(Pliny the elder),索斯特拉都斯係燈塔既首席建築師,並獲托勒密特許於建築物上打上自己既名字。燈塔既發明大大有利於航海業既發展,並改善左港口既運作,使貨船停靠亞歷山大港更容易且更安全。燈塔屹立於亞歷山大港既法老島都過1,000年,並廣為後人所模仿同複製。例如在羅馬皇帝克勞狄(Claudius)和圖拉真(Trajan)設計並修建意大利羅馬極大規模既人工港口波爾圖(Portus)既時候,就模仿亞歷山大港建造左兩座高度超過100米既燈塔。除此之外,以亞歷山大港燈塔為藍本既燈塔亦都遍佈羅馬境內各座大型港口,然而,羅馬人所建造既仿製品始終沒有超過亞歷山大港原版既高度及規模。而直到中世紀晚期哥德式建築尖塔興起之前,亞歷山大港燈塔所創下既記錄都未被超越。亞歷山大港燈塔見証住多次埃及政權更迭,由托勒密王朝到羅馬統治時代,再到阿拉伯統治時代,燈塔一直發揮引導船隻出入海港既作用。直到公元956年,燈塔被一場強烈地震所破壞,雖然被阿拉伯人所修復,但1303年及1323年兩次強烈地震再度將燈塔嚴重破壞,最終燈塔於1480年完全消失,其石塊被阿拉伯人用於原址上建造一座中世紀式城堡,而大量從傾倒燈塔掉落既建築材料則落入海中,直到20世紀末水下考古獲得重大進展前才被重新發現。

羅德島巨像

另一座希臘化時代的偉大建築係位於羅德島的羅德島巨像(Colossus of Rhodes)。巨像乃羅德島居民慶祝公元前305年戰勝圍城既德米特里一世(Demetrius I),即安提柯一世之子所建。德米特里一世放棄圍城戰後於當地留下大批攻城器械,羅德島居民將器械變賣獲得300塔蘭的款項,為建造巨像提供充足既資金。巨像設計師為林多斯的查爾斯(Chares of Lindos),於公元前292年開建,前280年建成。雕像屹立於羅德島的港口,底部為15米高、呈八邊形或圓形既大理石平臺,雕像以太陽神的形象為原型,總高33米,相當於現今紐約的自由神像的高度,係當時全世界最高既青銅雕像建築。雕像可能以攻城塔作之棚架建造,而當建造工程到達高處之時則由土堆圍繞,建成後移除土堆讓雕像得以自立。建築工人首先分段鑄成青銅片,由下而上以柳釘拼接出巨像的外殼,內部以鐵製的支架作為承重結構,並加入石塊以固定雕像。羅德島巨像屹立54年,在公元前226年該島被一場強烈地震侵襲,巨像因而倒下。當時托勒密三世(Ptolemy III)建議由埃及出資資助重建,但居民因宗教原因拒絕建議。巨像既殘件躺臥地上,直到羅馬時代的學者斯特拉波(Strabo)及老普林尼(Pliny the elder)亦有提及,而羅馬時代該遺址成為著名既旅遊景點,吸引大批遊人前往觀看。老普林尼甚至形容巨像一隻手指都唔能夠被一人雙臂環抱。巨像遺址最後既下場係響大約公元654年左右被征服羅德島既阿拉伯人溶掉並賣予伊德薩(Edessa)一位猶太商人,溶解巨像而成既銅錠足足要動用900隻駱駝先能夠移走。跟亞歷山大港燈塔一樣,羅德島巨像同樣受後世複製模仿,例如300多年後羅馬時代,公元1世紀既尼祿皇帝(Nero)就曾經模仿羅德島巨像在羅馬城內按照太陽神的形象建造一座尼祿巨像(Colossus of Nero),此巨像同樣高30米以上,外殼由青銅造成,此雕像比羅德島巨像好運,並沒有遭到地震摧毀而屹立數個世紀。而直到公元19世紀,羅德島巨像亦都成為法國送比美國人民慶祝美國獨立的紐約自由神像(Statue of Liberty)的創作靈感。

亞底米神殿到2,300

最後我仲要介紹一下以弗所亞底米神殿(Temple of Artemis)。以弗所(Ephesus)位於安納托利亞西部的愛琴海岸地區,該區自古已有希臘人於此定居活動。亞底米神殿最早公元前6世紀已存在,但較早建成既第二期既亞底米神殿曾經被縱火摧毀,直到希臘化時期,公元前323年開建既版本規模達至最大。希臘化時代所建既神殿長137米,闊69米,高18米,共有127根石柱支撐,曾經係世界最大既希臘神殿建築,規模比雅典有名既巴特農神殿更大(巴特農神殿長69.5米,闊30.9米,高13.72米,大小只有亞底米神殿一半)。雖然神殿曾於公元268年被入侵既哥德人破壞,但仍屹立600年直到希臘多神教於地中海式微為止。亞底米神殿既石柱曾被東羅馬皇帝查士丁尼用於建造聖蘇菲亞大教堂,如今原址早已面目全非,只有少數倒塌既石柱見證亞底米神殿曾經有既煇煌。

Tuesday, 12 February 2019

亞歷山大與希臘化時代:西方科學和藝術史第一個黃金時代(11)

亞歷山大與希臘化時代
西方科學和藝術史第一個黃金時代

全盛時既亞歷山大城3D復完圖,托勒密王朝既首都,在其全盛時代估計有超過50萬人口在其中居住。在公元前1世紀被羅馬城超越之前,曾經係當時世界上最大既城市(圖片:向左吐)

希臘化時代的城市建設

從亞歷山大大帝既誕生直到第四次繼業者戰爭既結束,希臘化時代早期既政局歷史就暫時講到呢度。響以下既篇幅中,我想深入探討一下既係希臘化時代既文明響科學、藝術、城市建設各方面既成就以及對當世和後世,甚至今時今日既影響。首先我想講下既係希臘化文明響城市規劃以及建設上所取得既成就。可能大家已經知道,希臘化文明並唔係城市建設既先行者,早響公元前3,000年,美索不達米亞南部既烏魯克(Uruk)已經有成熟既城市文明:數萬人口居住在一座超過10公里長既城牆圍繞既城市之中。除此之外,古埃及的孟菲斯(Memphis)、拉美西斯二世(Ramesses II)所建的拉美西斯城(Pi-Ramesses)、西臺帝國首都哈圖沙(Hattusa)、亞述首都尼尼微(Nineveh)、新巴比倫帝國首都巴比倫(Babylon)都係古典時代的偉大都市。但希臘人既到來,將東地中海既城市文明帶到一個新既高度。希臘自古以來屬於東地中海文明核心既一員,從米諾斯(Minoan)以及邁錫尼(Mycenae)文明開始,希臘人已開始擁有建造城市既經驗。而希臘城邦時代,即使希臘人既城市規模比不上美索不達米亞及埃及諸大城,但希臘人發明的棋盤狀街道的城市規劃,建立以市集、神殿、劇場為中心既公民社會,並擁有食水供應的城市,並不比近東城市規劃遜色。而希臘化時代既亞歷山大城人口超過50萬人,亦都遠遠超過左古美索不達米亞既城市規模(巴比倫全盛時大約有20萬人口)。

亞歷山大大帝征服已知世界既過程中,佢建立左70座以亞歷山大名字命名既城市,由埃及到塔吉克斯坦同印度。亞帝征服帶住一個傳播希臘文化既使命,而佢所建立既城市,就係將希臘文化帶到世界盡處既載體。亞帝死後,佢既繼業者托勒密(Ptolemy)同塞琉古(Seleucus)都繼承左亞帝響各地建設希臘式城市既意願。呢篇文章會集中介紹三座規模最大、歷史上最重要既希臘化城市:埃及的亞歷山大城(Alexandria),同時亦都係托勒密埃及既首都;以及塞琉古於公元前300年左右所建既安條克(Antioch)以及公元前305年左右所建既底格里斯河上既塞琉西亞(Seleucia on the Tigris)。希臘人既工程技術以當時世界黎講絕對稱得上係一流水平,而由希臘人所選出既古代七大奇蹟(Seven wonders of the ancient world)當中就有四個係由希臘人所建造。

公元前304年,托勒密(Ptolemy)稱王,是之為托勒密一世救主(Ptolemy I Soter)。托勒密一世在埃及面向地中海的亞歷山大城大興土木,首先修建了一條1260米長、200米闊既堤道,名為Heptastadion,將法老島(Pharos)及亞歷山大城連成一體。此外,托勒密一世修建東西兩條堤道圍出東西兩個港口,並疏浚港口既淤泥、建造大型既碼頭,令大量大型船隻都可以通航,呢點奠定左亞歷山大城成為埃及最大規模既商業及貿易中心既地位。Heptastadion以及港口工程量驚人,以公元前4世紀既標準係當之無愧既超級工程。由於托勒密既民族政策,除希臘人外,大批埃及人以及從猶大地遷移過來的猶太人定居響亞歷山大城,並在城內建立起希臘區(Greek quarter)、猶太區(Jewish quarter)以及埃及人區(Egyptian quarter),亞歷山大城亦都因此而成為一座多元文化、種族既世界級大都會。不過咁亦都有代價,亞歷山大城既治安惡劣,種族宗教衝突無日無之,直到後來的羅馬統治時代仍然如此。醉心於自然哲學既托勒密本人或托勒密的繼位者托勒密二世(Ptolemy II Philadelphus)響呢座城市建立當時全世界規模最大既圖書館(藏書達40萬冊)以及相連既國立學術研究院,即亞歷山大港圖書館(Library of Alexandria)及博物院(Musaeum of Alexandria)。博物院內設有講堂、實驗室、餐廳及宿舍,由國家出資聘請當時整個地中海世界最首屈一指的學者於館內進行各科的學術研究,並由托勒密政府提供研究經費,可以將其理解為古代版既常春藤大學。博物院最後產生左希臘化時代最重要既科研成果,關於托勒密埃及的研究機構及制度筆者會在稍後詳細討論。響公元前284年,托勒密二世響法老島上建造歷史上第一座燈塔:亞歷山大港燈塔(Lighthouse of Alexandria),燈塔高度達驚人既138米,接近胡夫大金字塔既146米,並曾經係全球第三高既人造建築物(僅次於吉薩Giza兩座大金字塔),花費800塔蘭並歷時12年建成,係果個年代既「摩天大廈」。現代的水下考古發現燈塔基座由逾百噸的巨石建成,建築物分成三層,第一層是正方形,第二層是八邊形,最頂層是圓形,燈塔最頂層設有巨大既鏡子及火炬,日間鏡子反射太陽光、夜間火炬照亮漆黑既大海。據聞燈塔既光遠在47公里外就能看見,離遠就能指引船隻進港。亞歷山大港規模龐大而超前既基建完工之後,呢座城市一直到羅馬時代甚至阿拉伯時代仍然係埃及最重要既港口及商貿城市。至今,亞歷山大港仍然係埃及第二大城市,亞歷山大大帝以及托勒密既遺產,一直持續到今時今日。

法老島上的亞歷山大港燈塔(Lighthouse of Alexandria)以及Heptastadion堤道(圖片:向左吐)
亞歷山大港燈塔復完圖
從亞歷山大港南邊向北望,可見城區及城牆外廣闊既城郊(圖片:向左吐)
亞歷山大港港口內既碼頭以及望海既王宮(圖片:向左吐)

除左托勒密之外,佢既競爭對手塞琉古一世(Seleucus I)亦響公元前4世紀末建立在兩座歷史上有名且具影響力既大城:位於東地中海海岸既安條克(Antioch)以及跟泰西封(Ctesiphon)隔河而望既塞琉古王國首都:塞琉西亞(Seleucia),兩座都曾經做過塞琉古王國首都。兩座城市全盛時都擁有數十萬人口,對比起埃及既亞歷山大城,以及西地中海既羅馬(Rome)和迦太基(Carthage)並不遜色。雖然兩座城市既考古工作進展遠遠比唔上亞歷山大城,但我地知道呢兩座城市係完全以希臘既城市規劃建造,當中塞琉西亞由300名議員組成的議會治理,並有大批希臘人定居。根據歷史記載,塞琉西亞響公元前141年被帕提亞波斯(Parthian Empire,中國古稱安息)征服後,直到公元165年被羅馬軍隊攻陷之前,仍保留不少希臘特色。而安條克延續既歷史就更長,由於地理位置處於軍事同貿易要衝,安條克從希臘化時代一直繁盛到十字軍東征既年代,超過1,300餘年。除左上面介紹過呢三座城之外,其他希臘化時代既城市如小亞細亞地區既巴格門(Pergamon)、以弗所(Ephesus)、米利都(Miletus)各有特色,而巴格門亦模倣亞歷山大港建有大圖書館,藏書達20萬冊,並聘用不少學者進行研究。巴格門既供水系統亦都係整個希臘化時代最先進,城內食水由工作靜壓300磅/平方英吋的超高壓供水管道提供,城內並設有浴場及公共廁所,並設有世界最早既花灑淋浴設施。在希臘化時代各城之間互相競爭,有如百花爭艷鬥麗,將人類既城市發展史推上新既高峰。以歷史角度睇,希臘化時代可謂古典時代城市發展史一個黃金時代。

全盛時既安條克(Antioch)3D完圖(圖片:向左吐)
 全盛時既安條克(Antioch)全景3D復完圖(圖片:向左吐)
 全盛時既安條克(Antioch)鳥瞰復完圖(圖片:向左吐)
 全盛時既安條克(Antioch)完圖(圖片:向左吐)
安條克(Antioch)近景:城內建築以及高聳既城牆(圖片:向左吐)

特別鳴謝:
亞歷山大城及安條克城3D復完圖圖片提供者之「百度貼吧拜占庭吧」網友「向左吐」
亞歷山大城3D復完圖原帖 https://tieba.baidu.com/p/3821648718?pid=69747659243
安條克城3D復完圖原帖  https://tieba.baidu.com/p/2792960216?pid=43853895612

Monday, 11 February 2019

亞歷山大與希臘化時代:西方科學和藝術史第一個黃金時代(10)

亞歷山大與希臘化時代
西方科學和藝術史第一個黃金時代

亞歷山大的繼業者塞琉古,即塞琉古一世(Seleucus I Nicator,公元前358年至281年)的雕像

第二及第三次繼業者戰爭

馬其頓的第一次繼業者戰爭以托勒密一派的勝利以及佩爾狄卡斯的死結束。然而,公元前319年帝國攝政安提帕特的死立即觸發左第二次繼業者戰爭。戰爭既導火線係安提帕特的兒子卡山德(Cassander)同安提帕特所指定的繼承人波利伯孔(Polyperchon)爭奪攝政之位。卡山德的支持者係安提柯同托勒密,而波利伯孔則與歐邁尼斯結盟,戰爭既結果係後者不敵並被逐出馬其頓。波利伯孔帶同羅克珊娜及亞帝兒子,年幼的亞歷山大四世逃亡到伊庇魯斯,並跟亞帝母親奧林匹亞絲串通,反攻馬其頓並跟腓力三世的軍隊遭遇,軍隊結果因不願跟亞帝兒子作戰而背叛腓力三世腓力三世下場是遭奧林匹亞絲處死。不久,戰局再次逆轉,卡山德勝利並反過來處死奧林匹亞絲,並控制了馬其頓、羅克珊娜以及亞歷山大四世。同時,歐邁尼斯則被安提柯的軍隊往東驅趕,歐邁尼斯集結大軍跟安提柯決戰,卻遭部下出賣而被殺,公元前317年,安提柯控制了亞洲領土的全部,這就是第二次繼業者戰爭的結局。

公元前314年,第三次繼業者戰爭既導火線係安提柯的勢力強大引起其他繼業者不安,托勒密、利西馬科斯及卡山德聯合起來跟安提柯敵對。安提柯入侵托勒密控制下的敘利亞,並跟前帝國攝政,卡山德的敵人波利伯孔聯合。然而當佢進攻卡山德和利西馬科斯時,噩耗從敘利亞傳來,托勒密打敗左安提柯兒子所率領既軍隊,而巴比倫總督塞琉古(Seleucus)則成功奪取帝國東方領土的大部分。安提柯面對腹背受敵的境地,因此他只能秘密和托勒密一派議和,並集中力量在東部對付塞琉古。然而當佢進軍巴比倫既時候,佢既軍隊被塞琉古擊敗而被逼議和。此時,卡山德秘密謀殺羅克珊娜以及亞歷山大四世並隱瞞事件,馬其頓阿吉德王朝終結,而個別將領篡位稱王的野心昭然若揭。

第四次繼業者戰爭及帝國的正式分裂


公元前303年第四次繼業者戰爭時期的各方勢力地圖,安提柯托勒密處奪得賽浦路斯控制權,但亞洲大片領土則落入塞琉古的控制中

公元前308年,托勒密征服愛琴海地區及賽浦路斯,塞琉古征服巴克特里亞並獲得中亞深處大片領土的控制權。安提柯則派出他的兒子征服希臘本土並控制雅典,將卡山德委任既總督德米特里逐出左雅典。德米特里將此事的責任歸咎於托勒密,他出兵攻打托勒密控制下的賽浦路斯並取得勝利。此後,安提柯與德米特里一起稱王,而不久後托勒密、塞琉古、利西馬科斯及卡山德相繼稱王。本來已經陷入內戰多年既馬其頓帝國正式宣佈瓦解,並由各將領所建立既各個希臘化王國繼承。前306年,安提柯挾之前戰勝托勒密軍隊的餘威準備出兵埃及本土,但因惡劣天氣未能得逞。然而在第四次繼業者戰爭中,卡山德及托勒密的勢力被削弱,而塞琉古則仍然盤據東部。前305年,安提柯入侵羅德島(Rhodes),托勒密派軍增援,最終羅德島居民仍向安提柯屈服並支持安提柯對付他除托勒密外的任何敵人。安提柯取得左戰略上既勝利,並全力攻打馬其頓的卡山德,而德米特里則返回雅典,將卡山德的勢力逐出希臘。

公元前4世紀末,卡山德安提柯議和,但安提柯拒絕對方伸出的橄欖枝,德米特里入侵希臘色薩利地區並跟卡山德交戰,卡山德則從佢既盟友中召集支援。此時,利西馬科斯入侵安納托利亞,德米特里被逼退兵返回安納托利亞支援佢父親既軍隊。利西馬科斯的軍隊因得到卡山德之弟的支援而橫行於安納托利亞,然而響前301年,利西馬科斯及卡山德的軍隊遭到安提柯圍困於安納托利亞北部,此時塞琉古既軍隊趕到增援利西馬科斯,雙方勢均力敵。在伊普蘇斯戰役(Battle of Ipsus)中,利西馬科斯、卡山德及塞琉古聯軍擊敗左安提柯,後者戰死沙場,而安提柯之子德米特里則逃回希臘。安提柯的失敗決定亞歷山大帝國無法重建,帝國的分崩離析成為既定事實。

公元前301年,伊普蘇斯戰役的勢力圖,塞琉古、托勒密和利西馬科斯瓜分安納托利亞前安提柯的領土

Wednesday, 6 February 2019

亞歷山大與希臘化時代:西方科學和藝術史第一個黃金時代(9)

亞歷山大與希臘化時代
西方科學和藝術史第一個黃金時代

巴比倫分封協議後馬其頓帝國國內的勢力劃分地圖

巴比倫分封協議

公元前323年6月11日,南征北伐十二年並將整個波斯帝國領土征服既亞歷山大大帝響巴比倫駕崩,根據歷史記載,佢響死前已經無法言語,因此呢個當時世界上最大既帝國好快陷入混亂,羅克珊娜則趁呢個機會刺殺亞帝的另一位妻子,佢既競爭對手波斯公主斯妲特拉二世,以確保自己權力穩固。響巴比倫,眾將領召開會議決定繼任人選,當時亞帝王后羅克珊娜已懷孕,但孩子尚未出生,不知道其性別。另外馬其頓步兵反對羅克珊娜所生的孩子繼承王位,理由係佢有亞洲血統,而當時馬其頓軍隊厭惡亞帝的民族融合政策。因此,會議中有人建議由將領佩爾狄卡斯(Perdiccas)繼承王位,理由係亞帝死前曾當眾將象徵王權既印戒交左比佩爾狄卡斯,但佢起初並唔敢登上王位,認為應該等羅克珊娜的孩子出生後才作決定,此建議得到騎兵派支持,但另一位將領墨勒阿革洛斯(Meleager)則反對建議,因為佢認為咁會令佩爾狄卡斯成為帝國攝政並大權在握,步兵派則支持亞帝同父異母的哥哥阿里達烏斯(Arrhidaeus)繼位,即使佢有智障既問題並唔適合當上一國之君的位置。另一位將領托勒密(Ptolemy)甚至建議廢除君主制改行共和制。在混亂中各方達成折衷既協議,由阿里達烏斯繼位,是為菲臘三世(Philip III),如果羅克珊娜的孩子係男孩,則與菲臘三世共治帝國,佩爾狄卡斯則作為攝政,並由墨勒阿革洛斯擔任副手。然而佩爾狄卡斯後來以閱兵為由騙墨勒阿革洛斯上當,閱兵典禮上佢宣稱要懲治叛亂分子,步兵派300人以及墨勒阿革洛斯被殺,佩爾狄卡斯大權在握。

響6月18日,即亞帝死後一個星期,各方亦都達成左帝國境內勢力既劃分。當中托勒密提議由佢出任埃及總督並獲得認可,塞琉古獲分得巴比倫尼亞地區,安提柯獲分得大弗里吉亞地區。諸將領獲分得土地後,危機暫時得到解決,但下一場戰爭正在醞釀之中。

亞帝遺體的爭奪以及第一次繼業者戰爭

亞帝將領托勒密(Ptolemy),即後來埃及托勒密王朝的建立人托勒密一世既雕像。希臘史上有名的智者國王,曾經設計奪去亞帝靈車及遺體而引發第一次繼業者戰爭。

亞帝死後,佢既遺體被安置響一副黃金棺材之內,並由香料及防腐藥物填充。公元前320年,亞帝的遺體以及黃金石棺被運離開巴比倫返回佢既家鄉馬其頓下葬,但中途響敘利亞時卻被埃及總督托勒密設計奪走並送到埃及的孟菲斯(後來響托勒密二世時期被移送到亞歷山大城並在該城的陵墓中安放到古典時代晚期,此後亞帝遺體去向不明)。帝國攝政佩爾狄卡斯大怒並帶兵往埃及征討托勒密,在此之前佩爾狄卡斯意圖同亞帝妹妹結婚已經引起安提帕特(Antipater)、克拉特魯斯(Craterus)、安提柯(Antigonus)和托勒密(Ptolemy)既不滿並暗中策劃叛變,亞帝遺體既爭奪只係比左佢地一個開戰既籍口。因此,第一次繼業者戰爭爆發,雖然佩爾狄卡斯陣營既歐邁尼斯(Eumenes)擊敗左亞美尼亞既叛亂同將克拉特魯斯殺死,但佩爾狄卡斯卻在埃及戰況失利而遭到軍隊背叛被殺,戰爭以佩爾狄卡斯一派既失敗告終。有份背叛佩爾狄卡斯既塞琉古(Seleucus)同安提貞尼斯(Antigenes)獲封巴比倫尼亞、埃蘭省,而培松(Peithon)仍保留為米底亞總督。而安提柯響得到安提帕特給他部份王軍而成為亞洲地區的統帥以及軍力最強的將領。

Tuesday, 5 February 2019

亞歷山大與希臘化時代:西方科學和藝術史第一個黃金時代(8)

亞歷山大與希臘化時代
西方科學和藝術史第一個黃金時代

巴比倫尼布甲尼撒既宮殿,亞帝響呢度度過佢最後既日子

返回波斯

公元前326年,亞歷山大的希臘軍隊拒絕繼續向東前進深入印度,亞帝決定沿印度河而下到該河流的出海口,並向西返回美索不達米亞。到達出海口之後,亞帝將軍隊分成兩半,一半登上海軍艦隻返回蘇沙(Susa)並探索波斯灣沿岸一帶,而佢本人則率領另一半的軍隊走陸路踏上歸途。然而佢所走既南路險阻重重,最大既問題係呢條路線要通過伊朗南部格德羅西亞沙漠(Gedrosian Desert)。響60日通過沙漠既行軍之中,亞帝的軍隊有可能因飢渴損失三分之一,呢個數字遠遠超過佢響各場戰役中所損失既人數。至於點解亞帝呢位軍事奇才會犯下呢種低級錯誤,連物資都未準備好就行軍穿過不毛之地?呢個一直都係個爭議不休既話題。有學者認為佢咁做係故意既,目的為懲罰希臘軍隊在印度拒絕繼續前進,故意通過缺乏水源的格德羅西亞沙漠地帶。亦都有理論認為佢咁做係要完成呢個波斯居魯士大帝(Cyrus the Great)都唔能夠完成既壯舉。無論真相係點都好,亞帝同佢殘存落黎既軍隊終於響公元前324年返抵蘇沙。作為嘗試融合東西方文化以及鞏固新建立帝國權力的所為,亞帝響蘇沙舉辦左一場盛大既集體婚禮,讓希臘將士迎娶波斯貴族的女子。而亞帝自己亦以身作則,迎娶大流士三世的女兒斯妲特拉二世(Stateira II)以及阿爾塔薛西斯三世(Artaxerxes III)的女兒帕瑞薩娣絲二世(Parysatis II),而亞帝的最好朋友赫菲斯提翁則迎娶大流士三世的另一位女兒德莉比娣絲,集體婚禮中結婚既新人都獲贈名貴賀禮。然而好多希臘官兵迎娶波斯女子並非出於自願,而純粹係為迎合亞帝的行為,因此佢地既婚姻並無任何感情基礎可言,當中好多對新人不夠一年就離婚。呢點顯示出亞帝民族融合政策所面對既阻力,以及當時希臘人對波斯人從骨子裡而出既厭惡同鄙視。

離開蘇沙之後,亞帝前往埃克巴坦那(Ecbatana)提取波斯帝國留低比佢的寶藏,但悲劇好快就發生響佢身上。響埃克巴坦那,亞帝最好的朋友,同時亦係佢最得力既助手赫菲斯提翁得急病猝逝,亞帝人生中頭一次遭到如此大既打擊。佢命令手下響巴比倫預備一場規模宏大既喪禮,風光厚葬赫菲斯提翁,並下令全國哀悼。當返回巴比倫之後,亞帝開始策劃一場新既征服,今次佢既目標係阿拉伯半島一帶。然而亞帝並無機會實現佢既願景同宏圖大計,因為佢自己本人亦將不久於人世。

亞帝之死

記載亞帝之死既《巴比倫編年史》泥板,亞歷山大的生平同事蹟除左記載響阿里安同普魯塔克既著作中之外,巴比倫史官亦都有用古老既泥板以及楔形文字予以記錄

亞歷山大完成佢既東征波斯的戰爭返回巴比倫不久,響公元323年6月10/11日,年僅32歲既亞帝就得左急病突然死於巴比倫尼布甲尼撒的王宮裡面。關於亞帝的死,古代作者有兩種講法,一種就係佢響巴比倫同海軍將領飲酒狂歡,不久佢就得左熱病,14日後離世。另一種講法係佢響紀念海克力斯的祭典中喝下未經稀釋既酒,結果因痛苦死去,期間並未有熱病既徵狀。除此之外,仲有關於亞帝係遭到下毒暗殺既陰謀論流傳。關於呢個可能性,歷史學家作出詳細既分析。當時馬其頓的貴族確實存在暗殺亞帝既動機,而亞帝不在希臘本土時擔任攝政既安提帕特(Antipater)被認為係最大嫌疑,但現代學者分析認為當時並無毒藥可以由中毒到死亡歷時十幾日之久,直到2003年有學者提出白藜蘆呢種長效毒物有可能被用於毒殺亞歷山大。現代歷史學界主流相信亞帝係得左傷寒熱病(Typhoid fever)而死,而佢響戰場上所受既傷、長期酗酒同因赫菲斯提翁之死承受既打擊亦都影響左佢既健康。

希臘化時代既開始

無論亞帝之死既真相如何,呢個係象徵住一代偉大征服者既殞落,但亦都象徵住一個時代既開始。亞帝死時,佢同羅克珊娜既遺腹子尚未出生,導致麾下將領群起爭奪控制權。佢既帝國最終將被麾下將領瓜分,響之後佢既繼業者們將統治橫跨歐亞非三洲大片土地。希臘化時代,係希臘文化影響左東方,同時希臘人亦都從東方文化中獲得借鑑,呢種雙向既文化交流同融合產生出整個新的文明,影響力遍及整個歐亞大陸,而希臘語亦都因此而成為當時既世界語言。而如標題所提及過既,呢個年代亦都會成為西方科學同藝術史一個黃金時代。尤其響托勒密治下既埃及亞歷山大城,將會成為當時其中一座世界最大既城市,而響果度規模龐大既圖書館同博物院(研究型大學既鶵型)被建立起來,吸引左歐亞非三洲最頂尖的學者前往此地進行教學及研究,當中有流傳千古的大數學家歐幾里德同亞基米德等。數學、幾何學、天文學、物理學、液壓學、解剖學、醫學、工程學、地理學、航海學同機械製造響短短百年間獲得爆炸性既進展,進步之大令人印象深刻,並為科學響西方既發展奠下穩固既根基。

Saturday, 2 February 2019

亞歷山大與希臘化時代:西方科學和藝術史第一個黃金時代(7)

亞歷山大與希臘化時代
西方科學和藝術史第一個黃金時代

記念亞歷山大大帝征服印度既銀幣,銀幣背面有印度戰象

入侵印度

公元前327年春,中亞地區已經在馬其頓軍隊的掌控之下,亞歷山大將視線轉向南方的印度。對於佢黎講,呢個係征服波斯同中亞之後一個合理的舉動,因為位於今日巴基斯坦境內既印度河流域早響公元前6世紀已經在波斯帝國的控制之下,而征服印度河流域意味住波斯最後的疆土最終落入馬其頓的手上。公元前326年,亞歷山大既軍隊遭遇印度西部國王波羅斯(Porus),並爆發左希達斯皮斯河戰役(Battle of the Hydaspes)。根據歷史文獻記載,呢場戰爭係亞帝打過最難打既一場戰役,並將會成為東征戰爭既最後一場大型會戰。波羅斯率領數萬大軍、數千騎兵並200頭戰象抵抗馬其頓軍隊的進攻,而佢明顯係有備而來。亞帝率軍來到希達斯皮斯河西岸,見對方大軍空群出動迎接,以及河水湍急,就知道勉強渡河係冇好結果。佢派出探子視察地型,最終決定於離營地27公里的一地點趁夜色渡河。為左唔比波羅斯知道自己渡河的確切地點及時間,亞帝命令軍隊作虛假的、似是疑非既調動,並兵分兩路,將部分軍隊留在河西岸的營地,另一部分則隨亞帝響夜色掩護下往渡河點過河,以擾亂波羅斯的視線。亞帝既戰術效果相當成功,當波羅斯知道佢已過河之後,立即派出佢兒子率領2,000兵力、120輛戰車前往阻止對方過河。然而佢最終都係後知後覺,因為亞帝此時已經讓5,000至6,000士兵過河並組織好隊型。呢場前哨戰既結果係馬其頓既勝利,波羅斯的兒子戰死,而所率領既前哨部隊全軍覆沒。

希臘軍及波羅斯軍隊雙方隔河對峙,亞帝率軍於營地27公里外過河

與之同時,留在原處的希臘軍隊蠢蠢欲動。波羅斯將戰象部署響第一線,以阻嚇亞帝既騎兵,兩翼以騎兵保護。亞帝見對方中央部分陣型整齊,不易突破,就挑選左右翼集中己方騎兵,務求令對方左翼騎兵招架唔住,而馬其頓方陣則斜行前進。亞帝命令方陣不要急於投入作戰,待騎兵分出勝負才作進一步行動。馬其頓軍以弓兵向敵方騎兵灑下箭雨,以擾亂對方陣營,此時由希臘軍將領科那斯率領的騎兵成功迂迴至印度騎兵後方,印度騎兵不敵只好往戰象處撤退並尋找掩護。希臘軍隊以標槍及弓箭對付戰象,但巨大的戰象踐踏馬其頓方陣,並擾亂左希臘軍既隊型。不過希臘士兵好快就掌握對付戰象既方法,就係對方一前進己方就後退,對方後退,己方就以標槍攻擊戰象。好多印度兵就咁夾響戰象中間遭到踐踏,波羅斯一方損失慘重,但即使面對戰敗,佢仍然未有如波斯王大流士三世一樣放棄自己既軍隊逃跑。佢英勇咁留到最後一刻,被亞帝俘虜。戰後,亞帝欣賞對方既勇氣,決定以向馬其頓帝國臣服作為條件將佢既王國歸還比佢。

希達斯皮斯河戰役雙方陣型圖

波羅斯手下印度軍隊的英勇作戰令亞歷山大的軍隊損失嚴重,雖然波羅斯最終戰敗,但馬其頓軍隊的信心已經受到動搖。尤其當佢地知道更東的印度難陀王朝軍力遠比波羅斯的軍隊龐大,加上不適應印度炎熱潮濕既天氣以及經多年在外征戰既思鄉情緒,馬其頓軍到比亞斯河之後拒絕繼續前進,亞帝的軍隊最終止步於比亞斯河(Beas River)。本來亞歷山大打算繼續進軍1,000公里左右並到達當時希臘人已知既世界盡頭,但由於軍隊拒絕前進,最後佢同意放棄繼續完成對印度的征服,並準備好返回西方。希臘軍響亞帝既率領之下沿印度河向出海口前進,期間攻打當地的部落並遇到頑強既抵抗,而期間亞帝本人亦遭弓箭射中而受傷。亞帝響印度河建立多座希臘式殖民城市,而呢批城市將來將會成為希臘化印度王國(Indo-Greek Kingdom)既文化同行政中心。亞帝到達印度河河口,與海軍會合並取道南路返回巴比倫。